Pexegos e máis pexegos

 

É o que ten a natureza que cando dá, dá. De pexegos imos abondo. Son da árbore que hai no patio da casa que acabamos de comprar. O patio é soleado e recollido. Aínda así, un día de vento e toda a froita caeu ao chan. Son dunha variedade que chaman "borrachos", de pel escura e a carne pegada a ela moi vermella. Non son ásperos.

 

Regalamos bolsas deles. Comémolos collidos da árbore. Fixemos marmelada, compota. Pexegos ao viño. Torta de pexegos. Todo tinxido desa viva cor vermella.

 

A compota é de pexegos e mazá, sen nada de azucre engadida e coa súa acidez natural. A marmelada é de pexegos pelados con azucre branca. O viño dos pexegos ao viño é Moscatel, aromatizado con anís estrelado.

 

Imos coas receitas… Son moi fáciles e só cómpre ter algo de tempo. Para cada preparación vai mellor froita máis ou menos madura.

 

Compota de pexegos borrachos

(para medio litro aproximadamente)

- 1 k de pexegos pelados e sen óso (1,5 k aproximadamente de pexegos enteiros e maduros)

- 2 mazás do país
- 2 culleradas de azucre ou panela (se queremos)

 

Pode cocerse nunha ola ou nun robot tipo Thermomix ou Mycook. Eu utilicei a Mycook.

 

Pelamos toda a froita e quitamos os carozos. A mazá cortámola en anacos medianos e os pexegos en metades. Engadimos o azucre. Programamos 30 minutos a 100ºC e velocidade 2, sen cubilete (poñemos no seu lugar un colador). Trituramos 15 segundos a velocidade 5. Se aínda está demasiado líquida programamos 5 minutos máis.

 

Nunha ola poñemos a cocer a froita a lume baixo, descuberta, durante aproximadamente media hora, ata que perda case toda a auga. Trituramos cunha batidora de brazo.

 

Envasamos enseguida. Como ía gardar a compota na neveira e era pouca cantidade, utilicei vasiños de iogurte recén lavados con auga moi quente. Tapei con film plástico. Unha vez fríos, gardeinos na neveira. Tamén se pode poñer en tuppers e conxelar.

 

 

Marmelada de pexegos borrachos
(para 3 botes)

- 1 k de pexegos pelados e sen óso (aproximadamente 1,5 k de froita madura)

- 600 gr de azucre branca
- unha mazá do país (opcional)

- zume de 1/2 limón (prescindíbel)

 

Pode cocerse nunha ola ou nun robot tipo Thermomix ou Mycook. Eu prefiro facer a marmelada nunha ola, para vixiar mellor o punto. Require tan pouca atención que paga a pena.

 

Unhas horas antes pelamos a froita e quitamos os ósos. Poñémola nun bol de plástico ou cerámico con 400 gr de azucre. A pel e o carozo da mazá metémolos nunha rede para cocer legumes.

 

Vertemos a froita e a rede nunha ola e cocemos a lume baixo, descuberta, xunto co resto do azucre. Removemos de cando en vez. Dependendo da cantidade de auga da froita, necesitará entre 30 e 50 minutos. O único coidado que debemos ter é que non se agarre ao fondo e acaramele. A proba é botar unha culleradiña nun prato e deixar que enfríe. Se está bastante espesa está ben.

 

Envasamos enseguida. Utilizamos botes de vidro. Se queremos que se conserven moito tempo na despensa, debemos lavar ben os botes e logo poñelos en auga fervendo durante 5 minutos, incluídas as tapas. Sacámolos con axuda dunhas pinzas e un guante de forno de goma e deixámolos boca abaixo nun trapo limpo. Podemos preparalos mentres se fai a marmelada.

Enchemos coa marmelada moi quente e pechamos coas súas tapas. Para esterilizar a conserva, colocamos un trapo de cociña limpo no fondo dunha ola a presión e os tarros de pé, cubertos de auga; fervémolos o tempo que indique o fabricante (uns 10 minutos). Nunha ola normal, fervémolos durante 20 minutos. Deixámolos que enfríen lentamente. Logo os poñemos boca abaixo ata que estén fríos de todo. Etiquetamos.

A diferencia está na temperatura que se acada. Na ola express chega a 115º e acaba con todo! É imprescindíbel para conservar peixe ou carne. Para froitas ou tomates non é necesario.

 

Para tres ou catro botes eu non fago isto. Esterilizo os tarros, boto a marmelada, tapo e logo doulles á volta para que faga baleiro. Unha vez fríos gárdoos na neveira.

 

Pexegos ao viño

- 1 k de pexegos pelados e sen óso (1,2 de pexegos enteiros e firmes)

- 1 vaso de viño moscatel

- 1/2 vaso de auga (ou ata cubrir os pexegos)

- 1/2 vaso de azucre

- 1 flor de anís estrelado

 

Pelamos a froita e quitamos os carozos, quedará en metade. Poñémola nunha ola xunto co viño, a auga, o azucre e o anís estrelado. Cocemos destapada a lume medio. Apagamos cando os pexegos estean tenros pero firmes. Podemos reducir o xarope fervéndoo uns minutos máis.

 

Envasamos enseguida. Utilizamos un bote de vidro moi ben lavado. Cunha culler ou cun cazo pequeno poñemos primeiro a froita e completamos con xarope. Cando menos líquido mellor, pero está tan bo que eu lle deixei sitio. Desta forma dura na neveira bastante tempo, pero non é unha conserva.