Doces de Nadal: mantecados de abelás e glorias de xema

El invitado de invierno é unha web xenial, explica receitas paso a paso e está chea de curiosidades e bonitas fotos.

Aí atopei esta xoia de doce que son os mantecados de abelás. É graxo pero ten moito sabor e aroma. Unha festa!

As glorias de xema son outra delicia. A xema doce é un recheo fantástico para o mazapán e tamén serve para tortas e brazos de xitano. É diferente á crema pasteleira e ao touciño de ceo. O mazapán feito con améndoas recén moídas tamén paga a pena. En fin, non se pode dicir que esta receita sexa fácil nin rápida. Ten bastantes pasos e é traballosa, pero moi agradecida!


Mantecados de abelás

Ingredientes
- 200 gr de abelás torradas
- 200 gr de fariña de trigo
- 150 gr de azucre
- 100 gr de manteiga de porco  (puxen "só" 80 gr)
- 2 culleradiñas de impulsor químico tipo Royal

Preparamos unha bandexa con papel de forno.

Moemos o azucre ata facelo po nun robot de cociña ou nun muíño de café. Derretemos a manteiga.

Mesturamos os ingredientes secos, engadimos a manteiga e amasamos a man. Estendemos a masa, achantándoa coa man ata que teña 1,5 cm de alto máis ou menos.

Cortamos os mantecados cunha forma redonda (6-7cm de diámetro) e poñémolos na bandexa algo separados. Case non crecen, pero un pouco si.

Deixamos repousar no refrixerador durante media hora. Mentres quentamos o forno a 180ºC.

Facemos ao forno 10-12 minutos, vixiando despois dos 10 minutos. Cando os bordos collan cor xa están. Sacamos a bandexa e non os tocamos atan que estean totalmente fríos.

Adornamos con azucre glas.

Glorias de xema

Ingredientes
Para o mazapán:
- 220-250 gr de améndoa cru Marcona
- 220-250 gr de azucre
- 1 clara de ovo mediana
Para a xema doce:
- 8 xemas
- un almíbar a punto de bola feito con 150 gr de azucre, 75 gr de auga e a pel dun limón (só a parte amarela)

Separamos as claras das xemas. As xemas deixámolas nun cacharro amplio, e rompémolas cunha culler de madeira ou cunha varillas.

Facemos o almíbar nun cazo a lume medio. Merquei un termómetro para xarabes porque estaba aburrida de non dar co punto do almíbar. Pois desta paseime, a receita indica 118-120ºC e apaguei o lume en 120ºC. Demasiado. A próxima vez apago en 115ºC.

Botamos o almíbar a fío sobre as xemas, á vez que remexemos ben. Logo devolvemos a mestura ao cazo e poñemos a lume baixo sen deixar de remexer coa culler ou coas varillas. A crema está lista cando espesa e comeza a separarse das paredes do cazo.

Deixamos enfriar a crema de todo. Eu fíxena o día antes.

Para o mazapán, facemos po o azucre (na MyCook é un minuto a velocidade progresiva 7-10). Apartámolo e trituramos a améndoa ata facela fariña (na MyCook 15 segundos a velocidade 10). Mesturamos os dous ingredientes secos (en principio 200 gr de cada) e engadimos a clara. Remexemos cun tenedor e logo coa man. Se está demasiado pringoso engadimos máis améndoa moída e máis azucre a partes iguais. Debe quedar consistente e moldeable, nin demasiado seco nin demasiado brando (se está moi brando, ademais de ser difícil darlle forma, no forno crecerá moito).

Partimos en anacos de 25-30 gr e boleamos. Collemos unha bola, facemos un burato co dedo no centro e estiramos os bordos ata que teña forma de vasiño. Enchemos cun pouco de crema de xema (utilicei unha culleradiña de café) e pechamos os bordos para dentro. Se o punto do mazapán é bo, non será difícil e selará ben. Vámolas poñendo nunha bandexa forrada con papel de forno.

Deixámoslas secar a temperatura ambiente 3-4 horas. Tamén se poden meter no refrixerador media hora. O obxectivo é que endurezan e non se deformen ou abran no forno. Se nos quedou un mazapán máis ben seco non é necesario agardar.

Quentamos o grill do forno a máxima potencia.

Separamos unha xema de ovo a unha cunca e movemos coa brocha. Pintamos as glorias.

Metemos a bandexa na parte máis alta do forno e vixiamos todo o rato ata que as glorias estean douradas, como moito dous minutos. Este gratinado debe ser moi rápido, como nas figuriñas de mazapán.