Tacos galaico-mexicanos (os meus favoritos)

Tacos caseiros e ao momento! Unha mestura equilibrada: graxa (chicharróns prensados), ácedo (zume de lima), fresco (tomate ou aguacate, cebola),  picante (chile verde) e identidade (torta de millo, cilantro). Un taco deber ser suculento, pero sobre todo debe ser rápido de preparar e de comer (en dous bocados).

Os chicharróns son estupendos para isto porque son un prato preparado que só hai que esmigar e pasar rapidamente pola tixola. Non son baratos pero cunden moito. Falo dos chicharróns clásicos, non á ferrolana, que son tripas recheas de chicharróns e fritas; sírvenas frías nalgúns bares (poucos xa). As tortillas de millo tamén se compran feitas, un choio do que tampouco hai que abusar; cómpre escoller das pequenas.

Ingredientes para 4 tacos
- 4 tortillas de millo pequenas
- 4 anacos de chicharróns prensados (do tamaño dunha cullerada colmada)
- 1/2 cebola morada
- zume dunha lima
- 1 cullerada pequena de azucre
- 1 tomate ou mellor un aguacate (que ademais están de tempada)
- sal fina
- 1 chile verde
- unha ramiña de cilantro fresco

Primeiro cortamos ben fina a cebola morada e a poñemos nunha cunca co zume de lima e o azucre, mellor media hora que un cuarto. Se é unha cea un pouco improvisada 5 ou 10 minutos abondarán.

Deixamos picado por separado o chile verde en rodas, o cilantro non demasiado fino e o aguacate en dados pequenos, pero lembremos que se oxida rápido, así que é mellor rocialo con algo do zume de lima e utilizalo canto antes.

Nunha tixola pequena quentamos os chicharróns esmigados, sen deixar que se queimen. Mentres quentamos unha tixola de ferro -eu teño unha fantástica de Buyer- sen nada de graxa, e tostamos lixeiramente as tortillas de millo. Quedan moito mellor que no microondas, pero hai que telas pouco tempo na tixola ou resultarán demasiado fráxiles.

Montamos os tacos: sobre cada tortilla poñemos os chicharróns e enriba o aguacate cun chisco de sal, a cebola ben escurrida, o chile e o cilantro. Cómense sen sentir!

Aviso
Atención ao chile! É mellor botar pouco e sen pepitas, e logo que cada un engada segundo o seu gusto ou o picante que sexa o chile. O cilantro e o aguacate son sensibles ao paso do tempo. O cilantro non é como o perixel, cómpre picalo pouco e unha soa vez, sen volver a pasar por el ou quedará esmagado e húmedo. Ademais debemos consumilo fresquísimo, porque cando leva demasiados días cortado ten gusto a xabón. De su ten un sabor peculiar, como a ferro, que gusta ou non, pero a xabón non.