Os mellores pratos son os que non necesitan receita

Ou podemos lembralos de memoria... tres ou catro ingredientes e instrucións tan sinxelas que forman parte do fondo de armario de calquer cociñeiro caseiro. A anti-cociña!

Teño para mostrar hoxe dúas tixolas da tempada de verán-outono. Case non hai nada que explicar.

Unha está feita con lombarda e mazá, máis unhas améndoas torradas por riba. A outra é un revolto de ovos, cebola, cabaciño e acelgas tenras mesturadas con follas de remolacha.

O importante é a calidade dos ingredientes: ovos de curral e verduras frescas. As que aparecen nas fotos son da nosa horta, procuramos coller os cabaciños cando son pequenos e as acelgas moi tenras.

 

Lombarda e repolo de finais de verán

 



Tixola de lombarda,mazá e améndoas torradas

- Unha lombarda mediana ou dúas pequenas, ou unha lombarda pequena e medio repolo corazón pequeno

- Unha mazá verde

- Améndoas fileteadas

- Aceite de oliva (o fondo da tixola, unhas catro culleradas)

- Sal

 

Quitamos as follas de fóra e a parte máis dura do colo á lombarda/repolo. Picámolos en tiras. Pelamos a mazá, quitamos o carozo e cortamos en dados.

 

Quentamos o aceite na tixola e botamos todos xunto cun pouco de sal. Tapamos. Remexeremos de vez en cando. Así, ata que a lombarda empece a caramelizarse (sen queimarse) e esté firme, pero comestible... a mazá estará máis branda, a lombarda terá partes máis duras... para saber cando está a punto hai que coidar dos últimos cinco minutos.

 

Á parte, tostamos as améndoas nunha tixola pequena sen nada de graxa, coidando que non se queimen. Botámolas por riba da sartén e a comer.

 

 

 

Ovos revoltos con cabaciño, acelgas e cebola

- Un cabaciño pequeno ou medio grande

- Unha man de acelgas de follas tenras e pouca penca, e unhas follas de remolacha tenras (se queremos)

- Media cebola

- Tres ovos de curral a temperatura ambiente

- Aceite de oliva (o fondo da tixola, unhas catro culleradas)

- Sal

 Acelgas, cabaciños e leitugas de principios de verán

 

Lavamos o cabaciño e picámolo en anacos pequenos. Lavamos as follas de acelga e de remolacha e picámolas, con tallos e todo. Ademais de ser nutritivas, as follas de remolacha darán cor ao prato. Picar a cebola moi miúda.

 

Quentamos o aceite na tixola. Engadimos a cebola e cando está transparente, o resto das verduras. Salgamos e tapamos. Remexeremos de vez en cando, ata que o cabaciño esté tenro.

 

Cando están as verduras batemos os ovos cun chisco de sal, pero sen bater en exceso. Botámoslos á tixola, remexemos un pouco e apagamos. Tapamos e agardamos con paciencia a que o ovo remate de callar. Terá suficiente calor se son 3-4 ovos e a tixola é de fondo gordo. Se é de ferro mellor aínda.